ಮಹಿಳಾ ರೈತರಿಗಾಗಿ ವಿಶೇಷ ಆರೋಗ್ಯ ತಪಾಸಣಾ ಶಿಬಿರ - ತುಮುಲ್ ನಿರ್ದೇಶಕ ಕೊಂಡವಾಡಿ ಚಂದ್ರಶೇಖರ್

ಮಧುಗಿರಿ: ಹೈನುಗಾರಿಕೆಯಲ್ಲಿ ತೊಡಗಿರುವ ಮಹಿಳೆಯರ ಆರೋಗ್ಯ ಅತ್ಯಂತ ಮುಖ್ಯವಾಗಿದ್ದು, ಮುಂದಿನ ದಿನಗಳಲ್ಲಿ ವೈದ್ಯರನ್ನು ಕರೆಸಿ ಮಹಿಳಾ ರೈತರಿಗಾಗಿ ವಿಶೇಷ ಆರೋಗ್ಯ ತಪಾಸಣಾ ಶಿಬಿರವನ್ನು ಆಯೋಜಿಸಲಾಗುವುದು" ಎಂದು ತುಮುಲ್ ನಿರ್ದೇಶಕ ಕೊಂಡವಾಡಿ ಚಂದ್ರಶೇಖರ್ ತಿಳಿಸಿದರು.

ಪಟ್ಟಣದ ಹಿಂದೂಪುರ ಬೈಪಾಸ್ ರಸ್ತೆಯಲ್ಲಿರುವ ತುಮುಲ್ ಉಪ ಕೇಂದ್ರದಲ್ಲಿ ಹುಣಸವಾಡಿ ಮತ್ತು ಕೆಂಪಾಪುರ ಹಾಲು ಉತ್ಪಾದಕರ ಮಹಿಳಾ ಸಹಕಾರ ಸಂಘದ ವತಿಯಿಂದ ಹಮ್ಮಿಕೊಳ್ಳಲಾಗಿದ್ದ **‘ಕ್ಷೀರ ಸಂಜೀವಿನಿ’** ಯೋಜನೆಯಡಿ ಚೆಕ್ ವಿತರಣೆ ಹಾಗೂ ಕಾನೂನು ಅರಿವು ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ರಾಜಕೀಯವಾಗಿ ಮಹಿಳೆಯರು ಸದೃಢರಾಗಬೇಕು

"ರಾಜಕೀಯದಲ್ಲಿ ಶೇ. 33 ರಷ್ಟು ಮಹಿಳಾ ಮೀಸಲಾತಿ ಜಾರಿಗೆ ಬರುತ್ತಿರುವ ಈ ಸಂದರ್ಭದಲ್ಲಿ ಹೆಣ್ಣುಮಕ್ಕಳು ರಾಜಕೀಯವಾಗಿ ಸದೃಢರಾಗಬೇಕು. ಮಹಿಳೆಯರಿಗೂ ಕಾನೂನಿನ ಅರಿವಿರಬೇಕು ಎಂಬ ಉದ್ದೇಶದಿಂದ ಅಧಿಕಾರಿಗಳನ್ನು ಕರೆಸಿ ಈ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ. ನಾನು ಅಧ್ಯಕ್ಷನಾಗಿದ್ದ ಅವಧಿಯಲ್ಲಿ ಜನ ನೆನಪಿಟ್ಟುಕೊಳ್ಳುವಂತಹ ನೂರಾರು ಅಭಿವೃದ್ಧಿ ಕೆಲಸಗಳನ್ನು ಮಾಡಿದ್ದೇನೆ," ಎಂದರು.

ವಿಸ್ತರಣಾಧಿಕಾರಿ ಮಧು ಮಾತನಾಡಿ, "ಹುಣಸವಾಡಿ ಹಾಗೂ ಕೆಂಪಾಪುರ ಸಂಘಗಳ ಉಳಿವಿಗಾಗಿ ಕ್ಷೀರ ಸಂಜೀವಿನಿ ಯೋಜನೆಯಡಿ ಒಟ್ಟು 7 ಲಕ್ಷ ರೂ.ಗಳ ಚೆಕ್ ಅನ್ನು ನಿರ್ದೇಶಕ ಕೊಂಡವಾಡಿ ಚಂದ್ರಶೇಖರ್ ಅವರು ವಿತರಿಸಿದ್ದಾರೆ," ಎಂದು ಮಾಹಿತಿ ನೀಡಿದರು.

ರಾತ್ರಿ-ಹಗಲು ಶ್ರಮಿಸಿದ ನಾಯಕ

ಪುರಸಭೆ ಮಾಜಿ ಸದಸ್ಯ ಎಂ .ಆರ್. ಜಗನ್ನಾಥ್ ಮಾತನಾಡಿ, "ತುಮುಲ್‌ನಲ್ಲಿ ಹಲವು ಜನ ನಿರ್ದೇಶಕರು ಬಂದು ಹೋಗಿದ್ದಾರೆ. ಆದರೆ ಕೊಂಡವಾಡಿ ಚಂದ್ರಶೇಖರ್ ಅವರು ರೈತರು ಮತ್ತು ಹಾಲು ಉತ್ಪಾದಕರಿಗಾಗಿ ರಾತ್ರಿ-ಹಗಲು ಶ್ರಮಿಸಿ ಹಲವಾರು ಸೌಲಭ್ಯಗಳನ್ನು ಒದಗಿಸಿಕೊಟ್ಟಿದ್ದಾರೆ. ಇವರಿಗೆ ಮುಂದಿನ ದಿನಗಳಲ್ಲಿ ಇನ್ನು ಹೆಚ್ಚಿನ ಅಧಿಕಾರ ದೊರೆಯುವಂತಾಗಲಿ," ಎಂದು ಆಶಿಸಿದರು.

ಕಾರ್ಯಕ್ರಮದಲ್ಲಿ ತರಬೇತುದಾರ ರಾಜ್‌ಕುಮಾರ್ ಅವರು ಮಹಿಳಾ ಹಾಲು ಉತ್ಪಾದಕರಿಗೆ ಕಾನೂನು ಅರಿವು ಮೂಡಿಸಿದರು. ವೇದಿಕೆಯಲ್ಲಿ ಪುರಸಭಾ ಸದಸ್ಯರಾದ ನಾರಾಯಣ್, ವೀರೇಂದ್ರ, ವನಜಾಕ್ಷಿ, ತಾಲೂಕು ಮುಖ್ಯಸ್ಥ ನಾಗರಾಜು, ವಿಸ್ತರಣಾಧಿಕಾರಿ ದಿವಾಕರ್, ಶೀತಲೀಕರಣ ಕೇಂದ್ರದ ವ್ಯವಸ್ಥಾಪಕ ಲಕ್ಷ್ಮೀಕಾಂತ್, ಪಶುವೈದ್ಯಾಧಿಕಾರಿ ರಘು, ಪ್ರಮುಖರಾದ ಧರ್ಮ, ದರ್ಶನ್, ಮಾರೇಗೌಡ, ಭವ್ಯ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.

ವರ್ಷಕ್ಕೆ 2 ಮಹಿಳಾ ಸಂಘಗಳಿಗೆ ಸಾಲ ಸೌಲಭ್ಯ

ಹೈನುಗಾರಿಕೆ ನಂಬಿ ಬದುಕುತ್ತಿರುವ ಲಕ್ಷಾಂತರ ಕುಟುಂಬಗಳು ಮತ್ತು ಮಕ್ಕಳ ವಿದ್ಯಾಭ್ಯಾಸಕ್ಕೆ ಹಾಲು ಒಕ್ಕೂಟ ಆಸರೆಯಾಗಿದೆ. ಮಹಿಳೆಯರನ್ನು ಆರ್ಥಿಕವಾಗಿ ಉತ್ತೇಜಿಸಲು **ಪ್ರತಿ ತಾಲೂಕಿನಿಂದ ವರ್ಷಕ್ಕೆ 2 ಮಹಿಳಾ ಸಂಘಗಳನ್ನು ಆಯ್ಕೆ ಮಾಡಿ ಸಾಲ ಸೌಲಭ್ಯ** ನೀಡಲಾಗುವುದು. ಒಂದು ಸಂಘದ 14 ಜನ ಸದಸ್ಯರಿಗೆ, ತಲಾ 50 ಸಾವಿರ ರೂ.ಗಳಂತೆ ಸಾಲ ಒದಗಿಸಿ ಹೈನುಗಾರಿಕೆಗೆ ಉತ್ತೇಜನ ನೀಡಲಾಗುವುದು ಎಂದು ಕೊಂಡವಾಡಿ ಚಂದ್ರಶೇಖರ್ ತಿಳಿಸಿದರು.

ರೂ. 7 ಲಕ್ಷದ 'ಕ್ಷೀರ ಸಂಜೀವಿನಿ' ಚೆಕ್ ವಿತರಣೆ

ಕ್ಷೀರ ಸಂಜೀವಿನಿ ಯೋಜನೆಯಡಿ ಹುಣಸವಾಡಿ ಮತ್ತು ಕೆಂಪಾಪುರ ಹಾಲು ಉತ್ಪಾದಕರ ಮಹಿಳಾ ಸಹಕಾರ ಸಂಘಗಳ ಉಳಿವು ಹಾಗೂ ಪ್ರಗತಿಗಾಗಿ **ಒಟ್ಟು 7 ಲಕ್ಷ ರೂಪಾಯಿ ಮೊತ್ತದ ಚೆಕ್** ಅನ್ನು ಮಹಿಳಾ ಫಲಾನುಭವಿಗಳಿಗೆ ಕಾರ್ಯಕ್ರಮದಲ್ಲಿ ಅಧಿಕೃತವಾಗಿ ಹಸ್ತಾಂತರಿಸಲಾಯಿತು. ಹೈನುಗಾರಿಕೆ ನಂಬಿರುವ ಮಹಿಳೆಯರ ಆರ್ಥಿಕ ಸಬಲೀಕರಣಕ್ಕೆ ಈ ಯೋಜನೆ ವೇಗ ನೀಡಲಿದೆ ಎಂದು ಅಧಿಕಾರಿಗಳು ತಿಳಿಸಿದರು.

ಮುಖಂಡ ಆರ್.ಎ. ನಾರಾಯಣ್,  ವೀರೆಂದ್ರ, ವನಜಾಕ್ಷಿ, ತಾಲೂಕು ಮುಖ್ಯಸ್ಥ ನಾಗರಾಜು, ವಿಸ್ತರಣಾಧಿಕಾರಿಗಳಾದ ದಿವಾಕರ್, ಶೀತಲಾ ಕೆಂದ್ರ ದ ವ್ಯವ್ಯಸ್ಥಾಪಕ ಲಕ್ಷ್ಮೀ ಕಾಂತ್, ಪಶು ವೈದ್ಯಾಧಿಕಾರಿ ರಘು, ದಿವಾಕರ್, ದರ್ಮ, ದರ್ಶನ್, ಮಾರೇಗೌಡ, ಭವ್ಯ ಇನ್ನು ಮುಂತಾದವರು ಇದ್ದರು.